السلام عليكم
اخواتي الغاليات اش خباركم او خبار ماعز عليكم
اليوم جبت ليكم مقلوبة التفاح كلتها عند واحد الناس عجبتني بزاف
ملي خديت المقادير جيت نشارك بيها نتمنى تعجبكم
مقادير الكراميل
كاس ونصف سنيدة
م ك زبدة
تفاح منقي او مقطع دوائر
العبار بكاس العنبة او الطياب في المقلة الوجدية ديال الحرشة
تنديرو السكر في المقلة او نديروه فوق نار مهيلة حتى يذوب
وولي كارميل عاد نطفو عليه او نزيدو معلقة كبيرة ديال الزبدة او نستفو
التفاح من الفوق
الطريقة بالصور
هذا السكر ملي ولا كرميل
هنا طفيت البوطا او زت الزبدة
هذا الشكل ديال الكارميل
قبل ما نستفو التفاح تندهنو جناب المقلة بالكاراميل.
بالنسبة للمرحلة الثانية بديت نوجد خليط الكيك بعد ما رديت السكر فوق البوطا مرة مرة كنت تنحركو باش ميتحرق
امكن ديرو كل مرحلة بوحدها الا خفتو الكرميل اتحرق منكم المهم انا وجت خليط الكيك بلحك مادرت الخميرة حتى ستفت التفاح فوق الكرميل
مقادير الكيك
عندنا 3 البيضات
كاس سنيدة
كاس ماعمرش زيت
2 كسان طحين
كاس دانون
2 خمارات حمرين
واحد فانيليا انا مستعملتهاش حيث دانون ديال الفريز
قبصة ملحة
تنخلطو البيض مع السكر او قبصة الملحة جيدا تنزيدو عليهم الزيت او نستمرو في التحراك +دانون +الطحين مع الخميرة
تنخوو العجينة فوق التفاح او ندخلها للفران
المقلة حطيتها فوق طاوت الفران مقلوبة او العافية كانت مهيلة باش الكراميل مايتحرقش
ملي خرجات من الفران خليتها تبرد شوية او قلبتها
ليست هناك تعليقات:
إرسال تعليق